Australian Open: Andrey Rublev dramatik qələbə ilə 1/4 finala yüksəlib

Rusiyalı tennisçi Andrey Rublev Australian Open turnirinin 1/8 finalında danimarkalı Holger Runeni məğlub edərək 1/4 finala vəsiqə qazanıb.

Rod Laver Arenada keçirilən qarşılaşmanın ilk dörd seti qarşılıqlı üstünlüklə keçib – 6:3, 3:6, 6:3, 4:6.

Həlledici setdə Rublev 2:5 hesabı ilə geridə olsa da, geri dönüş edərək seti tay-breykə daşıyıb. Tay-breykdə də 0:5 hesabı ilə geridə qalan rusiyalı tennisçi inanılmaz kambek edərək 9:7 hesabı ilə qalib gəlib.

Matçdan sonra Rublev bunları deyib:

"Karyeram ərzində belə matçlarda heç vaxt qalib gəlməmişdim. Bu, mənim üçün ilk idi."

Rublev 1/4 finalda Novak Cokoviçlə qarşılaşacaq. O, serbiyalı rəqibi barədə isə belə danışıb:

"Heç kim Novakla qarşılaşmaq istəmir."

Rublev – Cokoviç qarşılaşması 25 yanvar, Bakı vaxtı ilə saat 04:00-da keçiriləcək.